واضح انه ماحدش غيري هينزل بوستات هنا ...
وواضح انه اهل المدونه هجروها ...
وواضح بما انى الادمن هنا ..هحذفكم كلكم منها ..
هع هع هع ..
انتوا فين يا اهل فخفينا ؟؟
ماعندكوش نص ساعه تنزلوا فيها بوست ؟؟
ما عندكوش فكره طايشه تنزلوها ؟؟
نكته طيب ؟؟
فزوره ؟؟
كلمه ؟؟
بس ماحدش يدخل يقوللى حاجه ..
اي سؤال طيب ؟؟
انتوا فييييين ؟؟
هجرتوا المدونه بدري بدري ..!
طيب انا بقى عندي سؤال واقف فى زوري بالعرض ..!!
كتير جدا جدا نلاقى الناس تقولك دي الحياه وحششششششه..
دي الحياه مرررررررررره ..
دي سوداء مخططه اسود بالعرض وفيها نقط سوداء ..
ياحلاوة يا ولاااااد ايشي خيال ..
ايه الجمال ده ؟؟؟!!
التعليق بتاع سودا منقطه اسود ده شوفته فى بوست ..
لفت نظري اوى ...
للدرجه دي احنا كارهين حياتنا ؟؟
طب ليه ؟؟
ليه شايفينها بالسواد ده ؟؟
يمكن فيها اللى يدايق ويحرق الدم ..
ويعصب ويجيب الظغط والسكر والقلب ..
لكن احنا ليه دايما مابنشوفش
انه ممكن نكون احنا اللى مسودينها بإدينا؟؟
ماهى مش سوداء منها لنفسها كده يعنى ..!!!
اكيد فى اسباب ..
طب احنا دورنا على الاسباب دي ؟؟
حاولنا نتجنب الاسباب دي ؟؟
حاولنا نتلاشها ..ونشوف الدنيا بلونها الوردي ..؟
ليه لما بتحصلنا حاجه وحشه بنقول دي الدنيا وحشه ؟؟
طب هى الدنيا فعلا وحشه ؟؟
ماهى ماتخلقتش وحشه كده ..!
اكيد احنا لينا عامل ودور فى ده ..!
ولا ايه ؟؟!!
طب ليه شايفين الدنيا وحشه ؟؟
ايه الاسباب يعنى ؟؟
عشان اللى بيحصل حوالينا يعنى ؟؟
ولا عشان ايه ؟؟
حد فاهم حاجه ؟؟
والله شكلى بكلم نفسي ..!
سلام عليكم بقى ..
هناك ١٥ تعليقًا:
اهلا يا ست رضوى هانم
مش عاجبك انى بقول شايف الدنيا سودا؟؟؟؟
طيب خدى عندك
لما اتخرج من احسن كليه فى البلد واشتغل وظيفه كله بيقول عليها مرموقه وبعد 7 سنين دراسه يبقى مرتبى 300 جنيه دا يبقى ايه؟
لما اشتغل نوباتشيه 24 ساعه مرمطه واخد فيها 8 جنيه دا يبقى ايه؟
لما اشوف مغنى تافه ولا رقاصه مايعه بياخدوا فى الساعه اللى مش هاخدة انا ك دكتور فى عمرى كله دا يبقى ايه؟
لما ااقل شقه فى البلد تبقى باكتر من 100000 جنيه وانا مطلوب منى اجهز نفسى واجيب شقه وافرشها علشان اتجوز دا يبقى ايه؟
لما اتمسك وانا نازل اصلى الفجر وكأن دى تهمه دا يبقى ايه؟
اقولك تانى ولا كفايه كدا يا رضوى؟؟؟
ممممممممم
بس بردو دي كلها اسباب ماتسودش الدنيا فى وشنا ..
ال 300 جنيه شويه بشويه هيكبروا ..
ماحدش بيبدأ كبير ..
ماينفعش على فكره انك ان تقارن نفسك بمغنى ورقاصه .. لأنك حتما ولابد فى كل الاحوال انت افضل منهم .. فمامفيش وجه مقارنه ..
مش هاخدة انا ك دكتور فى عمرى كله دا يبقى ايه؟
الرزق ده نصيب ..والارزاق متوزعه ..
مهما جريت ومهام اتقطع نفسك مش هتاخد اكتر من رزقك اللى مكتبولك ..
الشقق دي على الكل يا دكتور ...
يعنى ماينفعش عشان مش قادر اجيب شقه
اقول على الدنيا سودا ..او وحشه ..
قول بس يااااااارب ..والله مفعولها ميه ميه .. قولها انت بس من قلبك ..
حكاية بقى انك تتمسك وانت نازل تصلي ماتقدرش تقول غير حسبي الله ونعم الوكيل ..
بس بردو مانسودش الدنيا فى وشنا ..
نورت المدونه يادكتور (:
يا بنتي
رمضاااااااااااان
وحشاني أوي يا أوا
وريت الفيدو كليب لبنت عمتي "أوا" امبارح
والله مش عارفة أقولك ايه
الأغنية والإخراج توحفة ربنا يكرمك
كل ما اشوفها بجد بتأثر فيه جدا
رضوى ربنا يراضيكي
فين السؤال ؟
فين سؤالك بالظبط ؟؟
معلش عشان صايم ومش مركز حد يقولى المودمزيل بتسأل على ايه ؟
رواء الدكرور
وانتى كمان وحشانى
اطلعى اون ياحجه (شاكوش )
قريب ان شاء الله هعملك فيديون تانى ..بس هاتيلي صور ياحجه .. او تاعلى نتصور سوا عشان اعملك فيديون تانى ..
ربنا يرضى عنك يابنتى
ماجاوبتيش ع السؤال ياحجه
وش بيبص لفوق
ممممممممممم
بشمهندس ابو نسمه
هو الصيام مأثر للدرجه دي ؟؟؟؟؟؟؟؟؟
لا حول ولا قوة الا بالله
طيب اقرأ تانى هتلاقى في سؤالين
جاوب اللى يعجبك فيهم
ايموشن بيصوت
شوفي يا ستي انا هامشي بالترتيب...ألصورة والسؤال الاول ثم السؤال الثاني ثم اتقفش بالبرشام واطلع برة اللجنة بزفة معتبرة
الصورة
الواد حمادة وهو بيتبوأ ف امريكا اللاتينية ...بس واضح انه تقلها ف السحور وجاله امساك
السؤال الاول
احنا فين؟...ف الدنيا...انا شخصيا ملخومة برمضان قليلا..وبنوضب الشقة..كمان حالتي النفسية متلصمة ومش متظبطة وبقول بلاش اقرف الناس معايا ببوست وجع قلب اقول فيه ان الدونيا سودا بكاروهات سودا برضك
السؤال التاني
ليه الدونيا سودا؟...اكيد مش غتاتة كدة وخلاص يعني.. الواحد بيتعرض لحاجات كتير تضايقه وتسود الدنيا ف وشه لكن بيختلف رد فعل كل واحد من التاني
حد هايكتئب ويعيط ويسمع رائعة شاني هاكر غنيوة "وفضيت علينا الدار"
او توحفة جورج واسوف "طبيب جراااااع ع ع ع " صحة وعافية يا سيدي...دة اللي هايشوف الدونيا سودا ف نص الكوباية الفاضي
ـ شاني هاكر بتاعت وائل عشان الحمرقة وحشة ف رمضان ـ
حد هايفكه من وجع القلب ويدور ينكت ويهزر ف كل حتة عند ف الدنيا السودا...انا بفكر دايما واقول لو كل الناس متأمرة عليا وعايزة تزعلني وتكئبني..يبقى انا اكتر واحدة المفروض افرح نفسي...اعتقد دة نص الكوباية المليان
بس اللي عارفني بيشوفوا الفرق...وبيقولوا ضحكتك غريبة ليه؟....هايبقى الرد سيبوني اضحك ضحكة غريبة ف دنيا غريبة ..احسن من مفيش
عزيزي القاريء
حتى لو الدنيا سودا...البس نضارة شمس شيك واتلكك فيها وقول دنيا سودا بمزاجي...وهاتنور لو قلعت النضارة
وانت اصلا مش محتاج تقلعها...لانها بتلم مزز بالهبل
رضوى...والنبي لبسي الواد حمادة حاجة لحسن يبرد بقى...محناش ف الحملة الانتخابية لفتحي العريان نصير البلابيص ...كوفاية امساك كدة الله يسترك يا امي
D:
نيني يا فقريه ..ربنا يسامحك ..هتموتينى من الضحك قريب ..
سيبك من حماده ده ولد مجرم قعد فى طبق الفول ماقامش منه غير لما مسحه ..:ker:
.........
ياستى تقرفي الناس ايه بس ؟؟
امال احنا عاملين المدونه دي ليه ؟؟
مش عشان نقرف خلق الله معانا ؟؟
اكتبي يابنتى كئيب حزين زعلان اى حاجه
مش مشكله .. ماتحوطيش فى نفسك يا اوختشي صحتك بالدونيا ..
ماشي ياستى الواحد بيتحط فى مواقف كتير زى الزفت وبيتعرض لحاجات سئه جدا جدا جدا جدا لكن ده مايخليناش نقول على الدنيا سودا بسبب مواقف .. ولا ايه ؟؟
**د هايفكه من وجع القلب ويدور ينكت ويهزر ف كل حتة عند ف الدنيا السودا...انا بفكر دايما واقول لو كل الناس متأمرة عليا وعايزة تزعلني وتكئبني..يبقى انا اكتر واحدة المفروض افرح نفسي...اعتقد دة نص الكوباية المليان***
عارفه مش حكايه فككان من وجع القلب ..ممكن يكون ظاهريا فقط .. لكن كتير جدا احنا بندي الحاجه اكتر من حجمها
ده مش احيانا ده غالبا ..
وهو ده اللى بيسود الدنيا فى وشنا .. انه لما بيحصل حاجه بنعتبرها ناهية العالم ..ونهايتنا ... طب ليه يعنى ؟؟
ماتقضيها زى ماهى ..وعيشها زى ماهى ..هتلاقى حلوة .. ولا ايه ؟؟
***
عزيزي القاريء
حتى لو الدنيا سودا...البس نضارة شمس شيك واتلكك فيها وقول دنيا سودا بمزاجي...وهاتنور لو قلعت النضارة
وانت اصلا مش محتاج تقلعها...لانها بتلم مزز بالهبل
****
متفقه معاكي بعض الشئ فى انها سودا بمزاجى ..لانه فعلا احنا اللى بنسودها .........
احنا احيانا بنكبر المواضيع ..لكن اساسا من رأيي انه مافيش حاجه تستاهل اننا نزعل عليها او منها ..
مهما كانت ..مافيش حاجه تستاهل ..واللى يستاهل فى حياتنا مش كتير ..
فليه نشوف الجانب الاسود اللى فيها ومانشوفش الجانب الوردي؟؟
شيلوا الستاره من عليه .. الدنيا هتنور ..
نيني..
اقلعى النضاره ياحجه
وسلامتك من النفساويه التعبانه ..
مافيش حاجه مستاهله ..
انا بقى طول عمر الدنيا عندي بمبى مسخسخ مش عارفة ليه دايما عندي امل في كل حاجة مهما اتعقدت الحياة والحياة لما تتقد لازم الناس تعرف ان ده شيء طبيعي ومش تكتئب وتزعل وتشتم في الدنيا وكده لان الانسان اتخلق عشان يشقى ويتعب ويعمر الارض فلازم يحتفظ بروح الائمان والتفاؤل
شيلوا الستارة دي انا شامة فيها ريحة منير لكن ما علينا
:)
***احنا احيانا بنكبر المواضيع ..لكن اساسا من رأيي انه مافيش حاجه تستاهل اننا نزعل عليها او منها***
ماهو زي ما الواحد ميقدرش يتحكم ف طريقة تعامله مع الزعل يعيط ولا يضحك...الواحد بردو مايقدرش يتحكم في مقدار زعله ...وكل حاجة ف الدنيا تستاهل طبعا الصغيرة والكبيرة تستاهل الواحد يزعل عليها...امال عايشين ليه لما الدنيا ملهاش اهمية ولا تستاهل؟
الفراعنة كانوا بيبنوا معابد وبيوت ومقابر رائعة للموتى بردو
دة في دعائنا نفسه بنقول ربنا اتنا ف الدنيا حسنة وفي الاخرة حسنة
انتي بتقولي للقاريء مش تزعل على اي حاجة لانه مفيش حاجة تستاهل مهما كانت
ومحسوبك بيقول لما تزعل اضحك بدل ما تعيط
رأيي بقى ان الاتنين غلط لانه محدش بيتحكم ف دة نهائي...كل واحد ادرى بنفسه ودي فروق بشرية صوابعك مش زي بعضها
نعيب زماننا والعيب فيــنا
وما لزماننا عيب ســوانا
ونهجو ذا الزمان بغير ذنب
ولو نطق الزمان لنا هجانا
وليس الذئب يأكل لحم ذئب
ونأكل بعضنا بعضاً عيانا
الامام الشافعي
البوست جميل جدا يارضوى
وشكرا لمرورك فى مدونتى
بس هى حالة إكتئاب ملاحظها فى كل المدونات
سارا
استمري متفائله يابنتى مهما حصل
خلي الدنيا على طول فى عيني بمبى مسخسخ
بس مين مسخسخ ده ؟؟
:ker:
نينى
شيلي الستاره مالهاش علاقه بمنير وربنا
انا معاكي انه ماحدش بيقدر يتحكم فى انفعالاته وقت الغضب ..وهيغضب ويثور ويحصل اللى يحصل
بس مايخليناش نقول على الدنيا سودا
فاهمه قصدي ؟؟
اخ m.k
صدق الشافعي فيما قال طبعا ..
.......
هموسه
حالة الاكتئاب دي هتلاقيها كتييييييير
منوره ياجميل المدونه
إرسال تعليق