الأربعاء، أبريل ٢٢، ٢٠٠٩

نحن هنا

سلام عليكم ورحمة الله وبركاته

إحنا
لسه عايشين
وفي الدنيا متبهدلين
وللهم شايلين
لكن قريب جدا
إن شاء الله راجعين

معلش كلمتين يجيبوا الكأبه
والإحباط
لكن فرجه قريب
قريب اوي

دعواتكم لآل فخفخينا

الأحد، يناير ١١، ٢٠٠٩

يوميات مراقب


في يوم من الايام انطسيت في عقلي وقررت اشتغل مدرس تشتغل مدرس فين ياعبد الرحيم يا جناوي ... تشتغل فين ياعبد الرحيم ياجناوي ....
( ده يعني علي اساس ان وزارة التربيه والتعليم بيت ابويا .. وانا حر في املاك جدو الباشا )بسسسس وعرق الوطنيه نط .. ... وقلت الوطن فوق كل اعتبار لااااااااازم اصلح المايل وافيد التعليم بافكاري المستحيله .... انزل الارياف ادرس للاولاد هناك امل المستقبل ( بقنع نفسي انه بمزاجي مش عايز كلام كتير ) لازم انمي الفكر هناك لابد احضرهم ( مش في كشكول التحضير لا من التحضر يعني ).... وفعلا اشتغلت وامري لله .. دخلت الفصول وشرحت ودرست وفهمت وطلع عيني وراح صوتي وكرهت كل ماهو اسمه اطفال وجائت اللحظه الحاسمه .... يوم الامتحان يهان المرء او يهان , اخيرا هشوف ثمرة تعبي وسهر الليالي ومُر التوبلكسيل والسيبتازول و الاوموكسيل اللي اخدتهم علي لوزي اللي العيال جابو اجلها ..

- يلا يا استاذ عبد الرحيم اتفضل استلم المراقبه
- يامسهل يارب ( دا انا )
ودخلت اللجنه ولقيت الاولاد حاضرين ومستحميين وانضف من الصيني بعد غسيله .. ايه العيال دي ولا كانهم في العيد - مسؤل الكنترول : وزع الورق يا استاذ .. وخلي بالك اوووووووووووعي حد يئعد جمب حد اووووووووووعي حد يدخل معاه كتاب اووووووووووعي حد يكون معاه برشام
( ايه الاخ اللي بيسف ده ) في سري طبعا
- لا لا اطمن يا استاذ دي ناس اعقل من كده بكتيييير مش معقول يخاطروا بحياتهم ويضيعوا مستقبلهم ناصع البياض بالافكار دي ( حسسني اني براقب علي طلبة ماجستير مش طلبة ابتدائي )الولاد صعبوا عليا لازم نبتسم في وجوهم ونحسسهم بالامان والاطمئنان ( وخلاص كنت هغنلهم ماما زمانها جايه ) لكن قطع حبل الغسيل .. يوووه حبل افكاري صوت ابله ( كايداهم ) زميلة الملاحظه في اللجنه وهي تنادي بصوت جهوري (واللي بيفكرني دايما بمارد مصباح علاء الدين ) علي ( فهيم فهمي ) ابن اخوها عشان توصيني عليه علي ما تروح تنشر الغسيل

- غسيل !!! هو مش حضرتك مراقبه هنا ولا ايه النظام ( دا انا برضه )
-ابله كيداهم : يفرحك .. صحيح ما انت مش عندك مسؤليات ولا بيت ولا عيال عايزين يرجعوا البيت يلاقو اكل جاهز وهدوم نضيفه وكنس ومسح وتنفيض...

- ( ايه الست اللي كارهه الحياه دي !! هو انا اللي قلتلها اشتغلي جتكوا ........ مليتوا البلد , قال معنديش مسؤليات قال .. ومال ايه اللي رماني الرميه البمبي دي .. يلا المركب اللي تودي) وبكل ود وحنان بثيت روح النضال في التلاميذ :يلا يا ولاد كل واحد يركز كويس عشان تنجحوا وتتفوقوا .. انتو امل البلد .. انتو شمس المستقبل .. انتو ....
و قاطعني صوت مسرسع طلعت البنت ( ست ابوها ) بنظرة عينها البريئه اللي تحتار فيها من كتر البلهه والعته متقدرش تحدد ان كانت بتبص اودامها ولا وراها ..

-اشتاااااااس .... السؤاي ته نخدنهوس!! ( اما الحق انزل بالترجمه قبل ما توهوا مني )
استاذ : السؤال ده ما اخدنهوش .
انا طبعا : ازاي يا بنتي دي النقطة دي بالذات شارحها 15 مره في الفصل
- قام مغاوري بكل حماس وقال : .. كداااااااااااابه يا استاذ اخدناه
- شوفتي عشان تعرفي انك نايمه وانا بشرح انتي ..
وقاطعني مخيمر .... لا يا استاذ ده استاذ مخلص عاطينا السؤال ه مع اسئلة الامتحان في الدرس وكلنا حافظنها بس هي اللي خايبه ومش عارفه حاجه .
- استاذ مخلص امين مدرس الرياضيات !! ( فعلا اسم علي مسمي ) ماله ده بالعربي !!
وفي هذه الاثناء يا سادة ياكرام اقتحمت اللجنه ابله نبويه صاحبة المفهوميه .. وبصوت كله حنيه ميفرقش كتير عن صوت مدفع رمضان : كله يبصلي ويركز , ولقيتها بكل خفه اخدت ورقة الطالب شحته .. والتفتت للسبوره , ومسكت الطبشوره .. وكتبت ... حل السؤال الاول
- (اييييييييييييييييييييييييييه ده قرطاس جوافه انا واقف هنا ولا ايه ) , ايه اللي بتعمليه ده يا استاذه نبويه ده ممنوع بصتلي كاني سّبتها وكشرت عن انيابها وصرخت زي صوت الغاره .. يا استاذ امييييييييين , ( وتقولشي امين ده كان اعد علي اكرة الباب )

- فيه ايييه , ( وداخل دخلة صلاح الدين للقدس )
نبويه : قال ايه الاستاذ بيقولك ممنوع ...كلم بئه , ( ايه كلم دي سماعة تليفون قدامها ولا ايه )
استاذ مخلص امين : ايييه ده انت وشك اصفر كده ليه .. مالك دايخ كده .. كل ده صداع .. لا لا انت لازم ترتاح اعتبر نفسك في اللجنه بالظبطططططططططططط يا عم ملواني عندك واحد شاي واسبرينه للاستاذ عبد الرحيم اتفضل يا استاذ في اوضة المدرسين ومتشيلش هم خااااالص ...

وفجاه لقيتني بره بقوة الدفع وبعد الامتحان اعطوني راحه من التصحيح وعفوني من التجميع وقالولي روح البيت يا خفيف , قلت طظظظظظظ اهم شيء مخالفش ضميري ويادوب وصلت لبوابة المدرسه ولقيت طفل بريء بكل برائة الذئاب اللي في الدنيا قال ... هو ده وبيشاور عليا .. ولقيت اهالي كتيييييييييييييييييييير بيجروا عليا ( ايه الناس الغريبه دي النتيجه لسه مظهرتش عشان يشكروني ) لسه مخلصتش تفكير ولقيت النور انطفي مع اننا في عز الضهر ...



الاثنين، يناير ٠٥، ٢٠٠٩

غزه



اللهم يا عزيز يا جبار اللهم اعز جندك وانصر دينك واتباع نبيك اللهم ثبتهم واربط على قلوبهم اللهم انصر اخواننا المجاهدين اللهم انصرهم على عدوك وعدوهم اللهم كن لهم وايدهم بتأييدك وانصرهم بنصرك اللهم انا نشكو اليك ضعف قوتنا وقلة حيلتنا وهواننا على الناس اللهم الى من تكلنا الى بعيد يتجهمنا ام الى عدو ملكته أمرنالك العتبى حتى ترضى ولك العتبى اذا رضيت اللهم ان عافيتك هي اوسع لنا اللهم انا نعوذ بنور وجهك الذي اشرقت له الظلمات ان يحل بنا غضبك او تنزل بنا نقمتك ..اللهم اكفنا شرورهم بما شئت انهم لا يعجزونك اللهم يا رب الارباب وملك الملوك يا من خضعت لك رقاب العباد يا عزيز يا جبار انهم لا يعجزونك اللهم خذهم أخذ عزيز مقتدراللهم انصرنا عليهم اللهم انصر اخواننا المجاهدين عليهم اللهم ان تهزم هذه الطائفة فمن يعلي رايتك بعدها اللهم انصرهم اللهم سدد رميهم اللهم تولى امرهم وكثر رميهم وسدد سهامهم ووحد كلمتهم واربط على قلوبهم وثبت افئدتهم ووحد صفوفهم وانصرهم على عدوك وعدوهم اللهم نصرا كنصر يوم بدرتعز به امتك وترفع به كلمتك وتنصر به دعوتك اللهم انا المقصرون في جنابك نرفع اكف الضراعة اليك لا اله لنا غيرك ولا رب لنا سواك اللهم يا حنان يا منان يا بديع السماوات والارض برحمتك نستغيث اللهم برحمتك نستغيث فلا تلكنا الى انفسنا طرفة عين ولا اقل من ذلك اللهم اغثنا اللهم اغثنا اللهم اغث اخواننا بغزة اللهم اغثهم اللهم كن لهم عونا ونصيرااللهم كن معهم برحمتك اللهم انصرهم اللهم انصرهم اللهم انصرهم برحمتك يا ارحم الراحمين اللهم آمين وصلى اللهم على نبينا محمد وعلى آله وصحبه وسلم

الأحد، ديسمبر ١٤، ٢٠٠٨

حارة زعتر

حارة زعتر

حارة من قلب مصر...صورة من مجتمع إنت عايش فيه ..أو نفسك تعيش فيه...
حارة زعتر بتعكس ملامح مجتمع كامل..مع "المتألقين" هتحس إنك إنسان جديد مش بس عايش لنفسك..لأ..ينابيع الخير في قلبك هتلاقي أكتر من مُتنفس..لما تساعد غيرك هتلاقي نفسك وهتحب المكان أكتر وهتقرر إنك تنضم ليه..هتدخل على بوابة الحارة هتلاقي أصحاب بيتكلموا في اللي نفسك تتكلم فيه..هتلاقيهم في الفرح بيهنوك وفي الألم بيواسوك...
وساعتها..
هتحس إن ده بيتك..
ودي حياتك..
ودول أهلك..
الشيخ مهدي قاعد في زاويته مستنيك وبيستنهض دايما همتك لفهم الدين والتقرب للخالق عز وجل ...والمنتجع التنموي والنفسي عبارة عن مكان ممكن تلقى فيه نفسك وتشكي فيه من همك ...من بيت جدتي هنية وبيت الخاطبة بتنطلق همسة حب بتدفع في نفسك الاحساس بدفء بيت العيلة ورائحة الأكل المضبوط النضيف والنصيحة والكلمة الطيبة...
لو بصيت لشمالك هتلاقي قهوة من غير لا شيشة ولا دخان ..لكن هتلاقي فيها نفس الدردشة ونفس الأحاديث الل ما بتنتهيش وفي ركن منها هتلاقي "لوكلوك أفندي" بيتلامض في كل حاجة وكالعادة مافيش حاجة في البلد عجباه
لو بصيت ليمينك هتلاقي الدكتورة رحمة قاعدة في عيادتها مستنية منك بس تقول آه علشان تقوم لخدمتك ولو بصيت قدامك هتلاقي حيطة كبيييييرة تساعي الكل ممكن ببساطة تخربش عليها إبداعك او ترسم عليها ملامح فنان ساكن جواك...
حارة زعتر فيها الملعب والورشة والسايبر ...
حارة زعتر فيها إنت
وفيها حياتك...
ما تترددش واسكن فيها هتلاقيها سكناك..

حارة زعتر

http://z3tr.arrawan.com/index.php

الثلاثاء، ديسمبر ٠٩، ٢٠٠٨

اهلا اهلا بالعيد




سلام عليكم اهل التدوين

كل عام وانتم بخير

عيد سعيد ان شاء الله

اعاده الله عليكم بالخير

ان شاء الله العيد القادم نكون جميعا على عرفات

اللهم امين

كل سنة وانتم طيبين

الجمعة، نوفمبر ٢٨، ٢٠٠٨

لماذا عبرت الطريق ؟!


سؤال تم طرحه كثيرا علي العديد من المفكرين ورجال السياسه ..


وهذا تصوري لاجابة البعض منهم ...
بن لادن تجرات وعبرت الطريق من موقعي هذا اتوعدها الا تعرف الامن والسلام اذا ما تراجعت عن موقفها فدمها حلال ان لم توقف عدائها السافر .
زويل لازم تخرج للعالم عشان تعرف ماشي ازاي لازم تجرب خليكو عمليين يا جماعه العلم اساس لكل شيء وروح الفريق اهم من التجربه ذاتها .
هاله سرحان لانها جريئه تمردت علي واقعها تمردت علي مجتمع ديوكي لا يعترف بحق الفرخه ويعتبرها مجرد وسيله للبيض احييها وادعو الفراخ الخروج من الحظيره .
اسامه منير بكل الحب والود خرجت عبر الطريق تبحث عن نصها التاني واحب انصحها واقولها مدوريش عن الحب استني لما هو اللي يجيلك الفرخه مهما كانت اسمها فرخه لازم يكون عندها كرامه ومتبداش هي بالخطوه دي .
ابراهيم عيسي اسالو فخامة الريس ليه الفرخه طئت من حياتها وخرجت كل راع مسؤل عن رعيته ولا ايه ياجيمي ؟؟؟!!
عمرو خالد هو في الحقيقه يا جماعه انتو بتتطرقو لمواضيع فرعيه احنا هدفنا نهضه عبرت او معبرتش ميهمناش ده ابدا احنا في وقت محتاجين فيه تركيز كل طاقتنا وتجميع همتنا للقيام بنهضه لإما هنضيع ومش هنلحق مواكبة التقدم
حمدي قنديل كلنا سمعنا عن الخبر ده واللي نفته بشده مصادر مسؤله علي الرغم من تاكيد صحيفة النيوزويك و الديلي ميرور .. مش عارف هتفضل حكومتنا ماشيه بمبدا داري علي شمعتك تقيد لحد امتي الفرخه اشجع من غيرها كتير قررت تعبر الطريق بدون خارطه .
هيكل الرئيس السادات تنبه لموضوع الفراخ وقالي يا محمد انا مش زي جمال مقدرش اقعد وعندي مشكله بالشكل ده .... وفي عهد مبارك ساعدنا المزارع الخاصه وكل دي مغامرات غير محسوبه هددت امننا القومي .فنحن نعيش حالة توازن قلق بين قوة السلطه العميقه من جهه والقوي الاجتماعيه التي تكبر و تتضخم وتعبر عن رايها من جهه .. ولاول مره تصبح القوتان متساويتان .
مفيد فوزي سؤال دائما يلح عليا لكني متاكد انها طقت من جنابها وخافت علي نفسها من الانفلونزا فاكره انها لما تروح لوزارة الصحه هتنجو متعرفش انها النهايه بالنسبلها اصل ادارة الازمات عندنا بتحب تقطع عرق وتسيح دم ومازال الناس في المدينه يتهامسون ويتسائلون عن السبب .
.احمد رجب عبرت الطريق .......... راحه تجيب اومو .
انيس منصور لما لا تعبره فهي فرخه تبحث عن قيد جديد تقيد به ديكها .
عمرو موسي في الحقيقة هي لها جهود ملموسة في مباحثات السلام ولكن هذه الجهود لن تكلل بالنجاح إذا لم تعي جميع الأطراف المعنية بالأبعاد الحقيقة للأزمة وهو ما تناقشنا فيه في آخر اجتماع واظنها قررت النزول لأرض الواقع للوصول لحلول فعليه مبتعدة عن القرارات العقيمة التي زادت من حدة الازمه بين الحكومات والجامعة .
رئيس الوزاره في الواقع والحقيقة أري أنها تسرعت في اتخاذ قرارها . فالحكومة أصبحت إلكترونيه بمعني إن كل خطوه محسوبة عليها والساعة بخمسه جنيه والحسابه بتحسب .يا ريت مترجعش تشكي وتتهرب من الدفع ويرجعو يقولو حكومه ظالمه هي من اختار طريقها .
قاسم السماوي عدت الطريق .. يا بختها عدت واحنا اعدين مش لاقين اللضا ... جتنا نيله في حظنا الهباب .
فلاح كفر الهنادوه اعوذ بالله ناس مورهاش غير القر والنق ديك النهار سمعت ابن ابو سويلم ابو لسان زالف بيقولك ان الفرخه سمعت انهم هيخصصو الطريق اياه فقالت في عقل بالها اما الحق اتمشي فيه واخد حقي منه قبل ما يقطعو تذاكر علي اللي رايح جاي . وكده تاخد حقها بوضع اليد وعلي المتضرر اللجوء للقضاء .قلتله اخرس يا وله عبيط ميعرفش ان القضاء واقع مع الحكومه هي الحكومه دي حد يقدر يقف في وشها دا ياخد تذكره لقفا السمس ..ويجعله عامر .
مبارك انها قدمت الكثير من اجل دعم جهودنا لاحلال السلام العادل بمنطقة الشرق الاوسط و تعزيز المشاركه بين مصر والدول الاخري ومساندة جهودنا لتحقيق التنميه الشامله والمتكامله والمجتمع العصري الذي نسعي اليه لكن من الواضح انها لم تتحمل مشاق العمل السياسي فظنت يوما انها ستري نتيجة جهودها .
مواطن مصري اكيد اسرائيل لها يد في الموضوع ده لانها بتكرهنا وسبب أي ازمه تحصل, اصل هي هتخرج ليه مش شايف سبب مقنع احنا الحمد لله عايشين في بلد الحضاره والتاريخ والناس الطيبين الكرمه ولاد نكته ميعرفوش الغدر ولا الخيانه هاديين وراضين وساكتين.صحيح مفيش وظايف , و التعليم يبوظ مايربيش والضرايب والفواتير كل يوم في زياده , والمرتبات بتنقرض والاسعار بتعلي وتكبر زي الغول ,والامراض منتشره وكل يوم وباء جديد بيستوطن عندنا ولاننا بلد مضياف مبيخرجش منها وعندنا قانون طواريء من 25 سنه والحمد لله ,والشوارع بتترصف صحيح بتتحفر تاني يوم بس اهو انجاز, وعندنا رجال اعمال ومليارديرات واكلين البلد بس عاملين شغل جامد بانين قري سياحيه وفنادق ومنتجعات ماهما لازم يطوروا البلد برضه .صحيح عندنا ناس تحت خط الفقر بزماااااان بس اهوم عايشين , صحيح الحكومه باعت البلد وخصخصتها وقبضت التمن بس الحمد لله لسه سايبنلنا الهوا اللي بنتنفسه الحمد لله اللهم دمها نعمه واحفظها من الزوال بالله عليكو يبقي الفرخه هتمشي ليه ؟؟؟اكيد اسرائيل لها يد .
**************************************************************************
تحديث
رؤية البشمهندس وائل
ممتاز القط : وعهد الله بنحبك ياريس وفى عهدك ياريس بقى فيه 010 و 012 و 011 وكمان الفرخه عدت الطريق بمنهتى السهوله
الاهرام : فى لفته انسانيه الرئيس يأمر بتعيين خمسه الاف شاب لمساعدة الفرخه فى عبور الطريق
الدستور : هل يشعر مبارك بالراحه عندما يشاهد الفرخه تعبر الطريق وتواجه الخطر وحدها؟
اخبار الحوادث :مرتضى منصور يرفع قضية على مستكه بسبب أن ابنته لا تستطيع النوم من الخضة على الفرخه وقلقها على مستقبل الفراخ فى مصر
روز اليوسف : مؤامرة الاخوان ضد عشه الفراخ ككل ..وتفاصيل الخلاف بين الانبا اسطافينويس والشيخ اسماعيل على طريقه ذبح الفرخه
النبأ: اسرار وجود البيكينى فى حفله عبور الفرخه للطريق فى فندق ع النيل
وشوشه : بالصور .. وائل مصطفى يتبادل القبلات مع الفرخه بعد عبورها الطريق فى منتصف اليل
الفجر : مستكه تساعد الفرخه سرا فى عبور الطريق وتملك فيلا فى مدينتى بها 2 بيسين وخط موبينيل برقم مميز



ام البنات : حسبى الله ونعم الوكيل.. خلاص يا ولادى مش مشكله انها عبرت الطريق المرة دى المهم نخلى بالنا ومتعبرش تانى .. المهم ان الكمبيوتر بايظ ومحدش عايز يجيى يصلحه وش بيشد فى شعر مستكه
هبه النيل : تصدقوا كنت لسه هقولكم ايه اخبار الفرخه؟ طب اشطه انها عدت بسلامه .. كان قلبى واكلنى عليها.. تنسعدى يا مستكه
مستكه : متنسوش ان الفرخه بعد ما عبرت الطريق هيبقى طعمها اجمل فى صينيه البطاطس وكمان ممكن تعملى بشوربتها لسان عصفور تانى يوم وممكن تستفيدى بالريش وتعملى منه مروحه .. دى حقائق يا اخوانا انا مجبتش حاجه من عندى
نايرى : وهيا الفرخه دى بسلامتها ماشيه بتدلع كدة ليه يا اخويا وهيا بتعبر الطريق تكونش حامل فى بيضتين .. .. عقبال البكارى .. فين الايموشن اللى بيزغرط .. فتكو بعافيه
رضوى : يانهاااااار ..الفرخه عبرت الطريق لوحدها .. ربنا يستر بقى ومنقولش عليها كفر مى اند كراى .. وش باصص لفوق يمكن يلاقى فرخه فى السما
طعمه : انتى متاكدة يا مستكه انها عدت عشان مظهرتش عندى لسه .. تكونش دى نعامه نفيرتيتى.. ياخوفى لتكون ماتت وهيا بتعبر .. عوض علينا عوض الصابرين يارب
ندى عياش :وانا رايحه الجامعه هلأ لمحتها بتعدى وفجأه اختفت .. صعبت عليا كتير .. اكيد دكتور الكيمياء تبعنا خطفها قبل ما تكمل طريقها.. طمنونى عليها
سيف الاسلام : ربما يكون الخبر له وقع الصاعقه علينا لكن يجعلنا بالتأكيد نفكر فى كل فراخ الشيشان التى تعبر الطرق المفخخه كل يوم بدون خوف .. اضغط على هذا الرابط ليصل صوتك ليعلم الجميع اننا نناصر ونساند وندعم فراخ الشيشان
احمد سالم : تفتكروا لو الفرخه دى لو فى بلد تحترم الفراخ كانوا سابوها كدة تعدى بنفسها ؟ على الاقل كان تم رصد ميزانيه مليون دولار لعمليه العبور فقط
عبير عمر : لا ارى فى عبور الفرخه للطريق حدثا يستحق الاهتمام ولا اشغل تفكيرى بالفراخ فغياب الضمير والاخلاق فى مجتمعنا سينتج عنه عبور لكل الفراخ .. فلماذا هذه الضجه لحدث اقل من العادى يتكرر يوميا
يقين : والله دى بلد تحرق الدم لما يسبوا الفراخ تعدى لوحدها كدة .. هنقول ايه اكتر من حسبى الله ونعم الوكيل فيهم وفى البلد وفى الطريق وفى المشاريع وفى الفراخ بالمرة .. توقيت كئيب جدا بعد سماع الخبر القاتل دة
محمود بجهت : الفرخه حاولت تعدى الطريق .. حاولت واجتهدت وعملت على نجاح محاولتها بكل اصرار تستحق منا كل احترام .. احترم تجربه الفرخه وحد يناديلى وائل
حبارير : الفرخه عبرت الطريق .. عبرت من العبور .. عبر يعبر عبورا .. علماء النحو يؤكدون ان العبور يختلف عن التعديه تماما .. عبرت مش عدت وطالما الفرخه لم تعبر الطريق تماما يبقى نقول الفرخه فى طريقها للعبور .. والخبر زادنى حبور .. والحبور من السرور
وائل مصطفى : من الواضح ان الفرخه انحرفت .. النهاردة عدت الطريق لوحدها .. بكرة تشرب سجاير وبعد بكرة نلاقيها عملت عمليه تجميل ونفخت مناقرها وبقت شبه خالدة الذكر هيفاء وهبى
ــــــــــــــــ
احترامى الكامل وتقديرى الشخصى لكل الاسماء المذكورة طبعا وحفظ الالقاب لهم جميعا ... الاخوات اللى مش بيشوفوا هنا ياريت تقولولهم عشان منبقاش جبنا سيرتهم من غير ما يعرفوا استر يارب

الجمعة، نوفمبر ١٤، ٢٠٠٨

براءةُ البراءة


لمحت عيناي بعيناها الضيقتين الممتلئتين بالبراءة
وأنا أقف بشمس النهار
وبمنهتى البراءة أشارت بيديها "بايباي"
دون أن تدري ملأت قلبي بهجة بابتسامتها الرائعة
وأشرت لها أنا الأخرى
بفرحة فاضت على ملامح وجهي
حتى ابتعدت السيارة التي كانت تستقلها
بعد خروجها من المدرسة
تلك فعلا البراءة ... براءة الطفولة..
وبراءة هؤلاء الأطفال ...
التي تزيدهم ...براءة
إنها ..
براءةُ البراءة!!!