الأحد، يناير 11، 2009

يوميات مراقب


في يوم من الايام انطسيت في عقلي وقررت اشتغل مدرس تشتغل مدرس فين ياعبد الرحيم يا جناوي ... تشتغل فين ياعبد الرحيم ياجناوي ....
( ده يعني علي اساس ان وزارة التربيه والتعليم بيت ابويا .. وانا حر في املاك جدو الباشا )بسسسس وعرق الوطنيه نط .. ... وقلت الوطن فوق كل اعتبار لااااااااازم اصلح المايل وافيد التعليم بافكاري المستحيله .... انزل الارياف ادرس للاولاد هناك امل المستقبل ( بقنع نفسي انه بمزاجي مش عايز كلام كتير ) لازم انمي الفكر هناك لابد احضرهم ( مش في كشكول التحضير لا من التحضر يعني ).... وفعلا اشتغلت وامري لله .. دخلت الفصول وشرحت ودرست وفهمت وطلع عيني وراح صوتي وكرهت كل ماهو اسمه اطفال وجائت اللحظه الحاسمه .... يوم الامتحان يهان المرء او يهان , اخيرا هشوف ثمرة تعبي وسهر الليالي ومُر التوبلكسيل والسيبتازول و الاوموكسيل اللي اخدتهم علي لوزي اللي العيال جابو اجلها ..

- يلا يا استاذ عبد الرحيم اتفضل استلم المراقبه
- يامسهل يارب ( دا انا )
ودخلت اللجنه ولقيت الاولاد حاضرين ومستحميين وانضف من الصيني بعد غسيله .. ايه العيال دي ولا كانهم في العيد - مسؤل الكنترول : وزع الورق يا استاذ .. وخلي بالك اوووووووووووعي حد يئعد جمب حد اووووووووووعي حد يدخل معاه كتاب اووووووووووعي حد يكون معاه برشام
( ايه الاخ اللي بيسف ده ) في سري طبعا
- لا لا اطمن يا استاذ دي ناس اعقل من كده بكتيييير مش معقول يخاطروا بحياتهم ويضيعوا مستقبلهم ناصع البياض بالافكار دي ( حسسني اني براقب علي طلبة ماجستير مش طلبة ابتدائي )الولاد صعبوا عليا لازم نبتسم في وجوهم ونحسسهم بالامان والاطمئنان ( وخلاص كنت هغنلهم ماما زمانها جايه ) لكن قطع حبل الغسيل .. يوووه حبل افكاري صوت ابله ( كايداهم ) زميلة الملاحظه في اللجنه وهي تنادي بصوت جهوري (واللي بيفكرني دايما بمارد مصباح علاء الدين ) علي ( فهيم فهمي ) ابن اخوها عشان توصيني عليه علي ما تروح تنشر الغسيل

- غسيل !!! هو مش حضرتك مراقبه هنا ولا ايه النظام ( دا انا برضه )
-ابله كيداهم : يفرحك .. صحيح ما انت مش عندك مسؤليات ولا بيت ولا عيال عايزين يرجعوا البيت يلاقو اكل جاهز وهدوم نضيفه وكنس ومسح وتنفيض...

- ( ايه الست اللي كارهه الحياه دي !! هو انا اللي قلتلها اشتغلي جتكوا ........ مليتوا البلد , قال معنديش مسؤليات قال .. ومال ايه اللي رماني الرميه البمبي دي .. يلا المركب اللي تودي) وبكل ود وحنان بثيت روح النضال في التلاميذ :يلا يا ولاد كل واحد يركز كويس عشان تنجحوا وتتفوقوا .. انتو امل البلد .. انتو شمس المستقبل .. انتو ....
و قاطعني صوت مسرسع طلعت البنت ( ست ابوها ) بنظرة عينها البريئه اللي تحتار فيها من كتر البلهه والعته متقدرش تحدد ان كانت بتبص اودامها ولا وراها ..

-اشتاااااااس .... السؤاي ته نخدنهوس!! ( اما الحق انزل بالترجمه قبل ما توهوا مني )
استاذ : السؤال ده ما اخدنهوش .
انا طبعا : ازاي يا بنتي دي النقطة دي بالذات شارحها 15 مره في الفصل
- قام مغاوري بكل حماس وقال : .. كداااااااااااابه يا استاذ اخدناه
- شوفتي عشان تعرفي انك نايمه وانا بشرح انتي ..
وقاطعني مخيمر .... لا يا استاذ ده استاذ مخلص عاطينا السؤال ه مع اسئلة الامتحان في الدرس وكلنا حافظنها بس هي اللي خايبه ومش عارفه حاجه .
- استاذ مخلص امين مدرس الرياضيات !! ( فعلا اسم علي مسمي ) ماله ده بالعربي !!
وفي هذه الاثناء يا سادة ياكرام اقتحمت اللجنه ابله نبويه صاحبة المفهوميه .. وبصوت كله حنيه ميفرقش كتير عن صوت مدفع رمضان : كله يبصلي ويركز , ولقيتها بكل خفه اخدت ورقة الطالب شحته .. والتفتت للسبوره , ومسكت الطبشوره .. وكتبت ... حل السؤال الاول
- (اييييييييييييييييييييييييييه ده قرطاس جوافه انا واقف هنا ولا ايه ) , ايه اللي بتعمليه ده يا استاذه نبويه ده ممنوع بصتلي كاني سّبتها وكشرت عن انيابها وصرخت زي صوت الغاره .. يا استاذ امييييييييين , ( وتقولشي امين ده كان اعد علي اكرة الباب )

- فيه ايييه , ( وداخل دخلة صلاح الدين للقدس )
نبويه : قال ايه الاستاذ بيقولك ممنوع ...كلم بئه , ( ايه كلم دي سماعة تليفون قدامها ولا ايه )
استاذ مخلص امين : ايييه ده انت وشك اصفر كده ليه .. مالك دايخ كده .. كل ده صداع .. لا لا انت لازم ترتاح اعتبر نفسك في اللجنه بالظبطططططططططططط يا عم ملواني عندك واحد شاي واسبرينه للاستاذ عبد الرحيم اتفضل يا استاذ في اوضة المدرسين ومتشيلش هم خااااالص ...

وفجاه لقيتني بره بقوة الدفع وبعد الامتحان اعطوني راحه من التصحيح وعفوني من التجميع وقالولي روح البيت يا خفيف , قلت طظظظظظظ اهم شيء مخالفش ضميري ويادوب وصلت لبوابة المدرسه ولقيت طفل بريء بكل برائة الذئاب اللي في الدنيا قال ... هو ده وبيشاور عليا .. ولقيت اهالي كتيييييييييييييييييييير بيجروا عليا ( ايه الناس الغريبه دي النتيجه لسه مظهرتش عشان يشكروني ) لسه مخلصتش تفكير ولقيت النور انطفي مع اننا في عز الضهر ...



هناك 7 تعليقات:

همس الحنين يقول...

كان يخدها من الاول ويحللهم الامتحان هو شكلة كدة جى من عالم تانى

مستكه يقول...

معلش ياهمس مكنش يعرف ان المعايير اتغيرت للدرجه دي

مكنش يعرف انه يقف طول السنه يشرح ويشرح وفي الاخر يملي في الامتحان

بس متخفيش دلوقتي عرف

عرف زياده عن اللزوم !

نورتي البوست يا همس

حسام مصطفي إبراهيم يقول...

بصراحة جميلة فوي.. أسلوبك حلو ومعبر عن واقع منيل بستين نيلة.. شكرا على مرورك على مدونتي وأتمنى متكونش آخر مرة.

مستكه يقول...

مستر حسام شرفتني بالزياره

ورايك في البوست وسام ليا

علي فكره كتاب حضرتك رائع ومعبر بشكل محصلش يمكن ميحسوش بجد الا اللي خاض التجربه فعلا

بالتوفيق دايما يارب

~ dr.Sondos ~ يقول...

مستكتى
ماشاء الله طلعتى معبرة درجة اولى
حلووو أوى يامستكة

وفعلا للاسف دا واقع

وربنا يرفع مقته وغضبه عنا

احبك فى الله ^__^

دعواتك

مستكه يقول...

سندوووسه

متعرفيش اد ايه وحشاني

عامله ايه واخبارك في الكليه ايه

ربنا يوفقك يارب

علي فكره بزورك كتير في المدونه بتاعتك بس انتي قافله التعليقات

الحمد لله اني اتقابلت فيكي اخيرا

منوره البوست يا دكتوره

انامل تتحدث يقول...

التوبيك جميل بيعبر عن واقع ........بستين......لكن الحاجه اللى انا مفهمتهاش مين جيل المستقبل دول؟؟؟؟