الجمعة، نوفمبر 28، 2008

لماذا عبرت الطريق ؟!


سؤال تم طرحه كثيرا علي العديد من المفكرين ورجال السياسه ..


وهذا تصوري لاجابة البعض منهم ...
بن لادن تجرات وعبرت الطريق من موقعي هذا اتوعدها الا تعرف الامن والسلام اذا ما تراجعت عن موقفها فدمها حلال ان لم توقف عدائها السافر .
زويل لازم تخرج للعالم عشان تعرف ماشي ازاي لازم تجرب خليكو عمليين يا جماعه العلم اساس لكل شيء وروح الفريق اهم من التجربه ذاتها .
هاله سرحان لانها جريئه تمردت علي واقعها تمردت علي مجتمع ديوكي لا يعترف بحق الفرخه ويعتبرها مجرد وسيله للبيض احييها وادعو الفراخ الخروج من الحظيره .
اسامه منير بكل الحب والود خرجت عبر الطريق تبحث عن نصها التاني واحب انصحها واقولها مدوريش عن الحب استني لما هو اللي يجيلك الفرخه مهما كانت اسمها فرخه لازم يكون عندها كرامه ومتبداش هي بالخطوه دي .
ابراهيم عيسي اسالو فخامة الريس ليه الفرخه طئت من حياتها وخرجت كل راع مسؤل عن رعيته ولا ايه ياجيمي ؟؟؟!!
عمرو خالد هو في الحقيقه يا جماعه انتو بتتطرقو لمواضيع فرعيه احنا هدفنا نهضه عبرت او معبرتش ميهمناش ده ابدا احنا في وقت محتاجين فيه تركيز كل طاقتنا وتجميع همتنا للقيام بنهضه لإما هنضيع ومش هنلحق مواكبة التقدم
حمدي قنديل كلنا سمعنا عن الخبر ده واللي نفته بشده مصادر مسؤله علي الرغم من تاكيد صحيفة النيوزويك و الديلي ميرور .. مش عارف هتفضل حكومتنا ماشيه بمبدا داري علي شمعتك تقيد لحد امتي الفرخه اشجع من غيرها كتير قررت تعبر الطريق بدون خارطه .
هيكل الرئيس السادات تنبه لموضوع الفراخ وقالي يا محمد انا مش زي جمال مقدرش اقعد وعندي مشكله بالشكل ده .... وفي عهد مبارك ساعدنا المزارع الخاصه وكل دي مغامرات غير محسوبه هددت امننا القومي .فنحن نعيش حالة توازن قلق بين قوة السلطه العميقه من جهه والقوي الاجتماعيه التي تكبر و تتضخم وتعبر عن رايها من جهه .. ولاول مره تصبح القوتان متساويتان .
مفيد فوزي سؤال دائما يلح عليا لكني متاكد انها طقت من جنابها وخافت علي نفسها من الانفلونزا فاكره انها لما تروح لوزارة الصحه هتنجو متعرفش انها النهايه بالنسبلها اصل ادارة الازمات عندنا بتحب تقطع عرق وتسيح دم ومازال الناس في المدينه يتهامسون ويتسائلون عن السبب .
.احمد رجب عبرت الطريق .......... راحه تجيب اومو .
انيس منصور لما لا تعبره فهي فرخه تبحث عن قيد جديد تقيد به ديكها .
عمرو موسي في الحقيقة هي لها جهود ملموسة في مباحثات السلام ولكن هذه الجهود لن تكلل بالنجاح إذا لم تعي جميع الأطراف المعنية بالأبعاد الحقيقة للأزمة وهو ما تناقشنا فيه في آخر اجتماع واظنها قررت النزول لأرض الواقع للوصول لحلول فعليه مبتعدة عن القرارات العقيمة التي زادت من حدة الازمه بين الحكومات والجامعة .
رئيس الوزاره في الواقع والحقيقة أري أنها تسرعت في اتخاذ قرارها . فالحكومة أصبحت إلكترونيه بمعني إن كل خطوه محسوبة عليها والساعة بخمسه جنيه والحسابه بتحسب .يا ريت مترجعش تشكي وتتهرب من الدفع ويرجعو يقولو حكومه ظالمه هي من اختار طريقها .
قاسم السماوي عدت الطريق .. يا بختها عدت واحنا اعدين مش لاقين اللضا ... جتنا نيله في حظنا الهباب .
فلاح كفر الهنادوه اعوذ بالله ناس مورهاش غير القر والنق ديك النهار سمعت ابن ابو سويلم ابو لسان زالف بيقولك ان الفرخه سمعت انهم هيخصصو الطريق اياه فقالت في عقل بالها اما الحق اتمشي فيه واخد حقي منه قبل ما يقطعو تذاكر علي اللي رايح جاي . وكده تاخد حقها بوضع اليد وعلي المتضرر اللجوء للقضاء .قلتله اخرس يا وله عبيط ميعرفش ان القضاء واقع مع الحكومه هي الحكومه دي حد يقدر يقف في وشها دا ياخد تذكره لقفا السمس ..ويجعله عامر .
مبارك انها قدمت الكثير من اجل دعم جهودنا لاحلال السلام العادل بمنطقة الشرق الاوسط و تعزيز المشاركه بين مصر والدول الاخري ومساندة جهودنا لتحقيق التنميه الشامله والمتكامله والمجتمع العصري الذي نسعي اليه لكن من الواضح انها لم تتحمل مشاق العمل السياسي فظنت يوما انها ستري نتيجة جهودها .
مواطن مصري اكيد اسرائيل لها يد في الموضوع ده لانها بتكرهنا وسبب أي ازمه تحصل, اصل هي هتخرج ليه مش شايف سبب مقنع احنا الحمد لله عايشين في بلد الحضاره والتاريخ والناس الطيبين الكرمه ولاد نكته ميعرفوش الغدر ولا الخيانه هاديين وراضين وساكتين.صحيح مفيش وظايف , و التعليم يبوظ مايربيش والضرايب والفواتير كل يوم في زياده , والمرتبات بتنقرض والاسعار بتعلي وتكبر زي الغول ,والامراض منتشره وكل يوم وباء جديد بيستوطن عندنا ولاننا بلد مضياف مبيخرجش منها وعندنا قانون طواريء من 25 سنه والحمد لله ,والشوارع بتترصف صحيح بتتحفر تاني يوم بس اهو انجاز, وعندنا رجال اعمال ومليارديرات واكلين البلد بس عاملين شغل جامد بانين قري سياحيه وفنادق ومنتجعات ماهما لازم يطوروا البلد برضه .صحيح عندنا ناس تحت خط الفقر بزماااااان بس اهوم عايشين , صحيح الحكومه باعت البلد وخصخصتها وقبضت التمن بس الحمد لله لسه سايبنلنا الهوا اللي بنتنفسه الحمد لله اللهم دمها نعمه واحفظها من الزوال بالله عليكو يبقي الفرخه هتمشي ليه ؟؟؟اكيد اسرائيل لها يد .
**************************************************************************
تحديث
رؤية البشمهندس وائل
ممتاز القط : وعهد الله بنحبك ياريس وفى عهدك ياريس بقى فيه 010 و 012 و 011 وكمان الفرخه عدت الطريق بمنهتى السهوله
الاهرام : فى لفته انسانيه الرئيس يأمر بتعيين خمسه الاف شاب لمساعدة الفرخه فى عبور الطريق
الدستور : هل يشعر مبارك بالراحه عندما يشاهد الفرخه تعبر الطريق وتواجه الخطر وحدها؟
اخبار الحوادث :مرتضى منصور يرفع قضية على مستكه بسبب أن ابنته لا تستطيع النوم من الخضة على الفرخه وقلقها على مستقبل الفراخ فى مصر
روز اليوسف : مؤامرة الاخوان ضد عشه الفراخ ككل ..وتفاصيل الخلاف بين الانبا اسطافينويس والشيخ اسماعيل على طريقه ذبح الفرخه
النبأ: اسرار وجود البيكينى فى حفله عبور الفرخه للطريق فى فندق ع النيل
وشوشه : بالصور .. وائل مصطفى يتبادل القبلات مع الفرخه بعد عبورها الطريق فى منتصف اليل
الفجر : مستكه تساعد الفرخه سرا فى عبور الطريق وتملك فيلا فى مدينتى بها 2 بيسين وخط موبينيل برقم مميز



ام البنات : حسبى الله ونعم الوكيل.. خلاص يا ولادى مش مشكله انها عبرت الطريق المرة دى المهم نخلى بالنا ومتعبرش تانى .. المهم ان الكمبيوتر بايظ ومحدش عايز يجيى يصلحه وش بيشد فى شعر مستكه
هبه النيل : تصدقوا كنت لسه هقولكم ايه اخبار الفرخه؟ طب اشطه انها عدت بسلامه .. كان قلبى واكلنى عليها.. تنسعدى يا مستكه
مستكه : متنسوش ان الفرخه بعد ما عبرت الطريق هيبقى طعمها اجمل فى صينيه البطاطس وكمان ممكن تعملى بشوربتها لسان عصفور تانى يوم وممكن تستفيدى بالريش وتعملى منه مروحه .. دى حقائق يا اخوانا انا مجبتش حاجه من عندى
نايرى : وهيا الفرخه دى بسلامتها ماشيه بتدلع كدة ليه يا اخويا وهيا بتعبر الطريق تكونش حامل فى بيضتين .. .. عقبال البكارى .. فين الايموشن اللى بيزغرط .. فتكو بعافيه
رضوى : يانهاااااار ..الفرخه عبرت الطريق لوحدها .. ربنا يستر بقى ومنقولش عليها كفر مى اند كراى .. وش باصص لفوق يمكن يلاقى فرخه فى السما
طعمه : انتى متاكدة يا مستكه انها عدت عشان مظهرتش عندى لسه .. تكونش دى نعامه نفيرتيتى.. ياخوفى لتكون ماتت وهيا بتعبر .. عوض علينا عوض الصابرين يارب
ندى عياش :وانا رايحه الجامعه هلأ لمحتها بتعدى وفجأه اختفت .. صعبت عليا كتير .. اكيد دكتور الكيمياء تبعنا خطفها قبل ما تكمل طريقها.. طمنونى عليها
سيف الاسلام : ربما يكون الخبر له وقع الصاعقه علينا لكن يجعلنا بالتأكيد نفكر فى كل فراخ الشيشان التى تعبر الطرق المفخخه كل يوم بدون خوف .. اضغط على هذا الرابط ليصل صوتك ليعلم الجميع اننا نناصر ونساند وندعم فراخ الشيشان
احمد سالم : تفتكروا لو الفرخه دى لو فى بلد تحترم الفراخ كانوا سابوها كدة تعدى بنفسها ؟ على الاقل كان تم رصد ميزانيه مليون دولار لعمليه العبور فقط
عبير عمر : لا ارى فى عبور الفرخه للطريق حدثا يستحق الاهتمام ولا اشغل تفكيرى بالفراخ فغياب الضمير والاخلاق فى مجتمعنا سينتج عنه عبور لكل الفراخ .. فلماذا هذه الضجه لحدث اقل من العادى يتكرر يوميا
يقين : والله دى بلد تحرق الدم لما يسبوا الفراخ تعدى لوحدها كدة .. هنقول ايه اكتر من حسبى الله ونعم الوكيل فيهم وفى البلد وفى الطريق وفى المشاريع وفى الفراخ بالمرة .. توقيت كئيب جدا بعد سماع الخبر القاتل دة
محمود بجهت : الفرخه حاولت تعدى الطريق .. حاولت واجتهدت وعملت على نجاح محاولتها بكل اصرار تستحق منا كل احترام .. احترم تجربه الفرخه وحد يناديلى وائل
حبارير : الفرخه عبرت الطريق .. عبرت من العبور .. عبر يعبر عبورا .. علماء النحو يؤكدون ان العبور يختلف عن التعديه تماما .. عبرت مش عدت وطالما الفرخه لم تعبر الطريق تماما يبقى نقول الفرخه فى طريقها للعبور .. والخبر زادنى حبور .. والحبور من السرور
وائل مصطفى : من الواضح ان الفرخه انحرفت .. النهاردة عدت الطريق لوحدها .. بكرة تشرب سجاير وبعد بكرة نلاقيها عملت عمليه تجميل ونفخت مناقرها وبقت شبه خالدة الذكر هيفاء وهبى
ــــــــــــــــ
احترامى الكامل وتقديرى الشخصى لكل الاسماء المذكورة طبعا وحفظ الالقاب لهم جميعا ... الاخوات اللى مش بيشوفوا هنا ياريت تقولولهم عشان منبقاش جبنا سيرتهم من غير ما يعرفوا استر يارب

هناك 22 تعليقًا:

blue-wave يقول...

ههههههههههههههههههههههههههههههه
والله العظيم تحفه
انا صوت ضحكى سمع الجيران:))
ههههههههههههههههههههههههههههه

مستكه يقول...

اهلا بحضرتك نورت البوست يافندم

اسعدني رد فعلك

معني كده اني وفقت في تقمص اراء الشخصيات

طب ياريت حضرتك تقولي ايه اكتر شخصيه عجبتك !

Wael Mostafa يقول...

موضوع اشطه جدااا على رأى د. هبه

موضوع تحفه والله

برافووو

عجبنى جدا كل الشخصيات لكن هيكل ابدعتى فيه وانيس منصور فى الجون وهاله وسرحان واسامه منير تفوقتى على نفسك بجد

انا راجع تانى ان شاء الله

Wael Mostafa يقول...

من واقع الجرائد

_______

ممتاز القط : وعهد الله بنحبك ياريس وفى عهدك ياريس بقى فيه 010 و 012 و 011 وكمان الفرخه عدت الطريق بمنهتى السهوله

الاهرام : فى لفته انسانيه الرئيس يأمر بتعيين خمسه الاف شاب لمساعدة الفرخه فى عبور الطريق

الدستور : هل يشعر مبارك بالراحه عندما يشاهد الفرخه تعبر الطريق وتواجه الخطر وحدها؟

اخبار الحوادث :مرتضى منصور يرفع قضية على مستكه بسبب أن ابنته لا تستطيع النوم من الخضة على الفرخه وقلقها على مستقبل الفراخ فى مصر

روز اليوسف : مؤامرة الاخوان ضد عشه الفراخ ككل ..وتفاصيل الخلاف بين الانبا اسطافينويس والشيخ اسماعيل على طريقه ذبح الفرخه

النباء : اسرار وجود البيكينى فى حفله عبور الفرخه للطريق فى فندق ع النيل


وشوشه : بالصور .. وائل مصطفى يتبادل القبلات مع الفرخه بعد عبورها الطريق فى منتصف الليل


الفجر : مستكه تساعد الفرخه سرا فى عبور الطريق وتملك فيلا فى مدينتى بها 2 بيسين وخط موبينيل برقم مميز

Wael Mostafa يقول...

الفكرة رغم انها مكررة الا انها فكرة جميله ... ياريت ننقلها زعتر بشكل اوسع وفكرة جديدة

Wael Mostafa يقول...

ام البنات : حسبى الله ونعم الوكيل.. خلاص يا ولادى مش مشكله انها عبرت الطريق المرة دى المهم نخلى بالنا ومتعبرش تانى .. المهم ان الكمبيوتر بايظ ومحدش عايز يجيى يصلحه وش بيشد فى شعر مستكه



هبه النيل : تصدقوا كنت لسه هقولكم ايه اخبار الفرخه؟ طب اشطه انها عدت بسلامه .. كان قلبى واكلنى عليها.. تنسعدى يا مستكه




مستكه : متنسوش ان الفرخه بعد ما عبرت الطريق هيبقى طعمها اجمل فى صينيه البطاطس وكمان ممكن تعملى بشوربتها لسان عصفور تانى يوم وممكن تستفيدى بالريش وتعملى منه مروحه .. دى حقائق يا اخوانا انا مجبتش حاجه من عندى




نايرى : وهيا الفرخه دى بسلامتها ماشيه بتدلع كدة ليه يا اخويا وهيا بتعبر الطريق تكونش حامل فى بيضتين .. .. عقبال البكارى .. فين الايموشن اللى بيزغرط .. فتكو بعافيه



رضوى : يانهاااااار ..الفرخه عبرت الطريق لوحدها .. ربنا يستر بقى ومنقولش عليها كفر مى اند كراى .. وش باصص لفوق يمكن يلاقى فرخه فى السما



طعمه : انتى متاكدة يا مستكه انها عدت عشان مظهرتش عندى لسه .. تكونش دى نعامه نفيرتيتى.. ياخوفى لتكون ماتت وهيا بتعبر .. عوض علينا عوض الصابرين يارب


ندى عياش :وانا رايحه الجامعه هلأ لمحتها بتعدى وفجأه اختفت .. صعبت عليا كتير .. اكيد دكتور الكيمياء تبعنا خطفها قبل ما تكمل طريقها.. طمنونى عليها



سيف الاسلام : ربما يكون الخبر له وقع الصاعقه علينا لكن يجعلنا بالتأكيد نفكر فى كل فراخ الشيشان التى تعبر الطرق المفخخه كل يوم بدون خوف .. اضغط على هذا الرابط ليصل صوتك ليعلم الجميع اننا نناصر ونساند وندعم فراخ الشيشان



احمد سالم : تفتكروا لو الفرخه دى لو فى بلد تحترم الفراخ كانوا سابوها كدة تعدى بنفسها ؟ على الاقل كان تم رصد ميزانيه مليون دولار لعمليه العبور فقط



عبير عمر : لا ارى فى عبور الفرخه للطريق حدثا يستحق الاهتمام ولا اشغل تفكيرى بالفراخ فغياب الضمير والاخلاق فى مجتمعنا سينتج عنه عبور لكل الفراخ .. فلماذا هذه الضجه لحدث اقل من العادى يتكرر يوميا





يقين : والله دى بلد تحرق الدم لما يسبوا الفراخ تعدى لوحدها كدة .. هنقول ايه اكتر من حسبى الله ونعم الوكيل فيهم وفى البلد وفى الطريق وفى المشاريع وفى الفراخ بالمرة .. توقيت كئيب جدا بعد سماع الخبر القاتل دة



محمود بجهت : الفرخه حاولت تعدى الطريق .. حاولت واجتهدت وعملت على نجاح محاولتها بكل اصرار تستحق منا كل احترام .. احترم تجربه الفرخه وحد يناديلى وائل


حبارير : الفرخه عبرت الطريق .. عبرت من العبور .. عبر يعبر عبورا .. علماء النحو يؤكدون ان العبور يختلف عن التعديه تماما .. عبرت مش عدت وطالما الفرخه لم تعبر الطريق تماما يبقى نقول
الفرخه فى طريقها للعبور .. والخبر زادنى حبور .. والحبور من السرور



وائل مصطفى : من الواضح ان الفرخه انحرفت .. النهاردة عدت الطريق لوحدها .. بكرة تشرب سجاير وبعد بكرة نلاقيها عملت عمليه تجميل ونفخت مناقرها وبقت شبه خالدة الذكر هيفاء وهبى

ــــــــــــــــ

احترامى الكامل وتقديرى الشخصى لكل الاسماء المذكورة طبعا وحفظ الالقاب لهم جميعا ... الاخوات اللى مش بيشوفوا هنا ياريت تقولولهم عشان منبقاش جبنا سيرتهم من غير ما يعرفوا

استر يارب

أم البنات يقول...

مستكه رائعه دائما يا حبيبة قلبى
بجد جميل
وشايفه وائل برضه بيتكلم عن الاكل والطبيخ
والله لو ذاق الكيكيه هيبطل يا كل كيك
اسفه ااقصد هيبطل يتريق على ابداعاتك
الشيفيه المطبخيه البوتجازيه


واااااااااااااااااائل
ماشى يا وائل
بصراحه تعليقاتك رائعه
يا ابنى انت شخصيه كمبيوتاريه
هتسألنى يعنى إيه
يعنى على النت هزار واريق فى الحقيقه جد جدا"
ربنا يكرمك ياوائل ضحكتنى

ياريت يا مستكه تعملى تحديث وتحطيها فى البوست
علشان الناس تيجى تاخد تارها من ابو نسمه

Mahmoud يقول...

ههههههههههههههههه

وائل كمان تعليقاتة تحفة

Ahmed يقول...

بسم الله ما شاء الله
فكره جميله جدا , وملاحظاتك رائعه والتعبير عنها باسلوب ممتاز

شكرا علي هذه الدقائق التي امضيتها في قراءه هذا البوست

مستكه يقول...

بشمهندس وائل

احنا هنقطع علي بعض ولا ايه

هههههههههه

لا بجد ماشاااء الله ومخبي كل ده فين بس

مشاركه ولا اروع

حقيقي جميله جدا جدا

علي فكره انا كنت نزلت الموضوع ده في زعتر وكنت اضفت له بعض شخصيات الحاره بس للاسف الشديد راح مع الحاجات اللي راحت

بس كنت محتفظه بالجزء ده منه عندي

كمان كان البشمهندس هشام البنا اضاف بعض شخصيات الحاره بمهاره لا توصف

فعلا خساره ان الموضوع وقع

بس اهو حضرتك عوضت اللي راح

بجد مشاركه متميزه جدا اجمل من البوست نفسه

انا هضيفه في التحديث وفي الحاره ان شاء الله

مستكه يقول...

ام البنات

مش هياكل كيكه تاني برضه

الحمد لله انه مش اكل منها

هههههههههههههه

والمعني في بطن الشاعر

بس شوفتي البشمهندس كان مخبي كل ده ازاي

بس احب اقوله ان صينية البطاطس باللحمه اجمل بكتير من الفراخ بس يلا كله شغال مادام اكل مش هنقول لا

واكيد ان شاء الله اعمل تحديث واحط الاضافه الجامده دي

نورتيني يا ام البنات والله

مستكه يقول...

اهلا وسهلا بحضرتك استاذ محمد

نورت يا فندم


...............................

استاذ احمد اهلا وسهلا بحضرتك

نورت البوست

وشكرا لمرورك الكريم

A . Salem يقول...

ياااااااااه

ليت الشباب يعود يوماً

ولا ايه ياوائل يابنى

------

عربت الطريق دى اصلا ياوائل كانت فى زعتر

صح ؟

انا فاكر كده مش عارف الزهايمر وصل معايا لفين ..

وبعدين ياوائل بينى وبينك الفرخة معبرتش ولا حاجه


هو فى حد يقدر يعبر حاجه طول ما العبار الكبير موجود

ده كان عبر على رقابته ..

الفرخة دى ومن الاخر زى ما قالت مستكه

اتعملت على صنيه بطاطس وشوربه لسان عصفور ...

سلمى يقول...

هو انا ضحكت اه بس مش فهما غير ان حضرتك بتتريق على المسؤلين
بس اسلوبك ممتاز
تقبل مرورى

Wael Mostafa يقول...

والله يا طنط نفسي اعرف شخصيه كومبوتريه دى يعنى ايه ؟

يعنى اناماشى بالماوس فى جيبى ؟ بشتغل برامات مثلا ؟ طب ولو الهارد ضرب كدة يبقى انا بالسلامه ؟؟

معلش عشان بهنج ساعات

يعنى ايه شخصيه كومبيوتريه ؟

Wael Mostafa يقول...

شكرا على التحديث والاضافه يا مستكه

رغم اننا لن نرقى الى مستوى ما تكتبون يا فندم

والله كلنا بنتعلم من سعادتك هنا

شخبطه سعادتك فى اى حته حتى لو بتشخبطى على الحيطه على رأى الست نانسى

فالشخبطه دى بتدينا امل فى بكرة

وبترسم طريق لمستقبل الاسرة والمجتمع


قولتيلى هتجيبى كام بقى ؟ ولا كيكه ايه ؟

لحسن ممكن ارجع فى كلامى دة كله

وش مترقب

Wael Mostafa يقول...

يا احمد يا سالم الموضوع اكبر من فرخه بتعدى

الموضوع له ايدلوجيه واهداف تانى

هدف فى الشوربه

هدف فى صنيه البطاطس

هدف فى المصاميص بتاعه الفرخه كمان

الموضوع مش سهل يا احمد كدة

Wael Mostafa يقول...

الاستاذه سلمى

منورة المدونه

يا فندم اللى بيتريق على المسئولين مستكه

هى صاحبه الفكرة والبوست

وهى اللى بتتريق

والله ما عملت حاجه يا عم

:d

Nairy يقول...

اتفضل استلم يا عم الحج

ــــــــــــــــــــ


من المعطيات المتاحه طريق وفرخه

اغلب الناس اللى اتكلموا هنا

اتكلموا عن الفرخه بس

رغم ان الطريق مهم جدا يا اخوانا

الطريق عادة هو بدايه اى طريق

منطقى جدا دة

يعنى لو الفرخه ماشيه فى طريق السلامه

غير ما تمشى فى طريق الندامه

المهم انها تمشى فى طريقها وخلاص

ومتمشيش فى طريقي انا

عشان مش هتبقى طريقه خالص

لماذا عبرت بقى

ايوة يعنى ليه عبرت

السؤال دة الوحيد اللى يملك اجابته الفرخه نفسها

مش بتاعتنا دى خالص

وبعدين فى العيد الكبير المفروض اننا منجيبش سيرة الفراخ خالص

نجيب سيرة خروف معدى مثلا

كباب حله يعبر الطريق

اتنين كيلوا لحمه وكيلوا ممبار

الوقت دة مش مناسب للفراخ خالص

لكل مقام مقال يا اسيادنا

يعنى ملاقيش واحد فى العيد الصغير بياكل رز بلبن وسايب الكحك

جااااااابر

شوربة لحمة ضاني هنا عشان صدعت

ال فرخة ال

وحاسب الفرخة قبل ما تعبر بسلامتها

وسمعني سلام امنت بالله

مستكه يقول...

ناااايري نيروشه

صباح الفل

ايوه كده ياحجه فينك من زمان

سوق البنادول راكد من غيرك

انتي كده بتقلدي بشمهندس وائل

صح

صح

صح

!!!

بيتهيالي انا صوووح

Abeer Soliman يقول...

بجد رغم كوميدية الموضوع "اللى خلانى هافطس من الضحك" الا ان جواه رؤية نقدية عالية جدا.. وقدرة عبقرية على التقاط أدق التفاصيل

مستكه يقول...

عبير

انا اسفه جداحالا شايفه مشاركتك

نورتي البوست

وحقيقي فرحت انه عجبك

دي اعتبريها تخاريف ساعة تهييس

علي فكره حاولت اشارك في مدونتك بس تقريبا انتي قافله الرد ولاايه !!